Bestekopname

~ Toortsie

Ek is sommer besig om my boeke op te maak. Om te dink waar ek staan. Met myself. En met my dinge. WIP. Werke in proses.

Want my ‘om te doen lysie’ is lewenslank en raak al hoe langer.

Want ek het mos maar altyd werke in proses. Dinge wat ek begin. Wat moet klaarkom.

Hier is goed wat nou regtig moet gebeur. Soos dat ek al my gedrukte boeke as e-boeke moet omskakel. Ek hét al op ‘n stadium met Toortsie 1 begin, maar tyd het my ingehaal. Dit was verlede jaar. Toe ek op so ‘n adrenalienvaart was. En my Toortsie 3 het seker minder as ‘n dag se werk oor, so hoekom doen ek dit nie en kry nie klaar nie? Die foto’s is al in Oktober geneem, ek het toe geweet dat ek eers in 2021 daarby gaan kom, maar hier trek ons al by die middel van April! Wat gaan aan? Dan is daar ‘n halwe skryfkursus. Kortverhaalkursus.

Dis hoekom ek soms moet boeke opmaak, soos ons in my ouerhuis gepraat het. Net ‘n bietjie gaan kyk wat is op my te doen lysie wat nou eerste prioriteit moet verdien.

Wel, ek hét op 3 Januarie Covid opgedoen. Seker nie ‘n goeie verskoning nie, maar ek was goed siek, hoor! Hondsiek. Daarná moes ek weer my lewe stukkie vir stukkie aan die gang kry.

Intussen het ons stal se rekenaar opgepak en alle data is verlore. Gelukkig is dit ‘n stoet en stuur ons baie gereeld die inligting vir Jersey SA en Stamboek. So alles is darem nie heeltemal verlore nie. Maar al daardie koeie moes weer op die stelsel kom. Gelukkig het ons melkstalbestuurder die meeste daarvan gedoen, maar ek moes ook help. Is steeds besig. Want as gevolg van die opgepakte rekenaar kon ek nie voor alle diere op is en aan die gang nie, die koeie registreer nie.

En vroeg in Maart moes die VLV kompetisieartikels ingegee word. En dit moes klaar kom. Nee, daar is nie moete hierby betrokke nie, ek hoef dit nie te gedoen het nie, maar ek wou. Sjoe, ek het darem die hele verlede jaar aan die groot artikels gewerk, natuurlik wou ek dit ingee!

En toe was ons vir ‘n paar dae weg.

So, wat het ek nou besluit ná my bestekopname? Nadat ek boeke opgemaak het?

Dat ek in hierdie week my Engelse Toortsie se e-boek moet regkry en publiseer. Dis nou eerste prioriteit, want een of ander tydskrif in Amerika, gemik op Suid-Afrikaanse Vroue, wil graag een van my resepte insit. En dán wil ek hê dat die e-boek beskikbaar moet wees. Mens weet mos nooit?

Dat die staladministrasie wat ek wel moet doen, registrasies en sulke dinge, ook in hierdie week moet gebeur.

Dat Toortsie 3 dan die volgende prioriteit is en ek my deel van die werk moet afhandel sodat dit na die proefleser en bladuitlêer kan gaan en dit gedruk kan word. Ja, tussendeur is ek heeltyd by die proses betrokke en sal ek nog ‘n hele twintig keer weer deur die boek moet gaan. Daar moet nog ‘n klein veranderinkie aan een van die resepte kom, dit moet nou gedoen word en klaar.

Dan sal ek weer kyk wat aangaan. My kleinseun se babakombers wat ek nou groter hekel, gebeur so tussenin en ek wil begin aan hierdie jaar se nuwe borduurprojek en dan kom daar nog ‘n borduurkursus ook …

Ag, dit is lekker! Die lewe is lekker! Veral as jy jou kreatiwiteit mag uitleef. Want dit is nie altyd moontlik om dit te doen nie, né, maar as ek dan nou tydjies moet steel om dit te doen, soos om in die middel van die nag as jy wakker lê stilletjies op te staan … hoekom dan nie? Al wat gebeur is dat jy dan iewers in die middel van die dag poot-uit voel, maar daaraan kan ‘n mens mos ook iets doen as jy gelukkig is, of hoe?

Toortsie

Gepubliseer deur Toortsie

'n Flitsliggie wat oral inskyn, ook waar dit soms ongemaklik is... A Flashlight whose light shines everywhere, even on places where it is not so comfortable.

32 thoughts on “Bestekopname”

  1. Jy is besig, hoor. Voel of al my kreatiewe sappe uitgesuig word met huisskoonmaak, was en stryk. En dan kosmaak en oppas dat dit nie brand nie. Skottelgoed was ensovoorts. Ek kan nie mooi beskryf waarheen my dae gaan nie. En kragverdeling wat nog boonop bepaal dat saans uit die tyd om wel iets te doen, steel.

    Like

    Antwoord

    1. Ek moet jou eerlik sê dat ek nie te veel tyd aan huisskoonmaak ens spandeer nie. Ek is dankbaar om ‘n Maria te hê wat een keer per week my huis goed skoonmaak en stryk. Deur die week gooi ek die wasgoed in die masjien en hang dit op. Vleis maak ek in grootmaat sodat ek nie elke dag dit hoef te doen nie. Dan maak ek net vinnig ‘n slaai of groente. Ek lê ook baie groentes in vir slaaie wat ek dan net oopmaak. En skottelgoed was ek net wanneer daar genoeg goed is, nie heeldag of drie keer per dag nie. 🙂 Dan het ek meer vrye tyd om die ander lekker dinge te doen.

      Liked by 1 person

      Antwoord

      1. My man wil sy kos elke dat vars gemaak hê, eet nie baie groentes nie en daarom is dit meestal rys, vleis en aartappels. Ek vermoed voel of ek nie veel doen nie omdat artikels so ‘n lang proses is. En jy sien eers beel later die resultate.

        Like

        Antwoord

  2. DIt is goed om besig te wees! My ‘to do’ lys is baie, baie lank, maar ek is bly om een te kan skryf – daar is mense wat soggens opstaan en wonder hoe hulle deur die dag sal kom. Huisskoonmaak, was en stryk is altyd daar – kook ook – maar alles hoef nie elke dag to doen word nie. Vroeg elke oggend is MY tyd van die dag; ek doen geen huiswerk in die middae nie, en laat saans is ook wanneer ek tyd spandeer op my eie skryfwerk / lees / iets kreatief doen. Hou so aan!

    Liked by 1 person

    Antwoord

  4. Ja jong daardie besig wees met dinge wat afgehandel moet word is maar alryd daar. Het amper die handoek maandag ingegee om nie verder te gaan met my waterverf opdragte. Gelukkig het ek vandag besluit om die drie dae wat ek nie iets gedoen het in te haal. Mens voel sommer goed as jy positief gewerk het al is dit nog nie klaar nie. Ek hou ook daarvan om te weet hoe ver dinge staan.

    Liked by 1 person

    Antwoord

          1. Dankie vir jou ondersteuning ook. Ek leer baie by jou. Het vandag toe amandel meel gebruik om plaatkoekies te bak. Dit wou toe nie omdraai nie omdat die mengsel te pap is. Het in jou twee boeke gekyk vir soiets en nie regtig gekry nie. Wou eintlik iets met dadels gemaak het.

            Liked by 1 person

            Antwoord

        1. Uitstekende span, dis wat ons is. Ons is mos darem nie sommer net onnodig stiefskoonsussies nie! En die ander Amigo’s maak die span volledig.Jis, dis ‘n lekker groep!

          Like

          Antwoord

    1. Wat ander mense doen klink altyd baie, want jy wil dit aan dit wat jy doen meet. Die waarheid is dat jy weer baie ander goed doen waarby ek nie uitkom nie. Ek is baie bly dat jy jou breinaalde en wol uitgehaal het. Geniet dit! Daar is min dinge so inspirerend soos om kreatief te wees nie. 🙂

      Like

      Antwoord

Gesels saam, asseblief!

Verskaf jou besonderhede hieronder of klik op 'n logo om in te teken:

Gravatar
WordPress.com Logo

Jy lewer kommentaar met jou rekening by WordPress.com. ( Log Out /  Verander )

Facebook photo

Jy lewer kommentaar met jou rekening by Facebook. ( Log Out /  Verander )

Kanselleer

Connecting to %s