Iemand skryf op die ‘Ons Hekel’ groep op Facebook oor die neusoptrekkerige opmerking wat iemand vir haar gegee het, blykbaar dat die persoon nog nie oud genoeg is om te hekel nie. Ja, wel. Sommige mense trek steeds hulle neuse daarvoor op en dit is hulle eie voorreg, hulle kan seker met hulle neuse maak wat hulle wil!
Ek was sommer nog ‘n kleine dogtertjie toe my ouma Ellie my leer hekel het. Sy het oumablokkies gehekel wanneer sy by ons kom kuier het. My ouma Lenie het die lieflikste tafeldoeke gehekel met baie dun gare, nie Tridalia nr 5 of 8 nie, eerder Mecer no 20! Sy het my leer hekel van ‘n patroon af en as hoërskoolkind geleer om met gare te hekel.
Ek het graag gehekel, maar gou agtergekom dat daar mense is wat dink dat hekel benede brei is. Wel, ek kon ook brei op ‘n baie jong ouderdom. Ek was in Sub B, deesdae se Graad 2, toe ek by tannies Mags en Willa loseer het. Tannie Mags het heeldag en aldag gebrei en kort voor lank het sy vir my ook geleer hoe. Ja, ek kan brei. En ek is mal daaroor. En ek kan hekel. En mal daaroor ook. En tot vandag toe kan ek nie verstaan hoekom sommige mense hekel as minderwaardig ag nie. As iets wat ‘oumas’ doen. Gelukkig is ek mos nou ‘n ouma en mag ek hekel na hartelus! 🙂
As tiener het ek graag op die stoep by die see gesit en hekel, kan jy nou meer. Nie met die kêrels rondgeloop nie. Ek onthou dat ‘n tannie vir my gesê het dat ek dit nie moet doen nie, hekel, bedoel ek nou. En beslis nie op die stoep nie. Wel, ek het seker daardie tyd soos ‘n oujongnooi met my hekelpen gelyk? Vir ander mense, natuurlik, want ek het nie gedink dat daar fout met my was nie. Ek dink dit steeds nie! En snaaks genoeg, ek hét op ‘n vroeë ouderdom my droomman ontmoet en getrou, lank voor die ware oujongnooiskap my sou tref. Gelukkig het my hekelry hom nog nooit gepla nie!
Soos reeds gesê, mag mense sekerlik hulle neuse optrek wanneer en hoeveel hulle wil. Ek sal tog aanbeveel dat, indien hulle dit wel doen, hulle dit ingelig doen. Want ek kry die idee dat baie mense hulle neuse optrek vir handwerk, spesifiek hekelwerk, uit onkunde.
Want hekelwerk is ‘n kuns. Dit verg intelligensie om ‘n ingewikkelde patroon te lees en uit te voer. Dit verg hand- en vingervaardigheid en ‘n aanleg daarin om dit te doen. Dit verg ook uithouvermoë. Maar, soos wat soveel mense kan getuig, is dit absoluut vervullend om te doen. Heerlik! Bevredigend. Jy kan vir ure daarmee besig wees sonder om verveeld te raak en wat die lekker daarvan is dat jy, soos wat jy daarmee besig is, onder jou hande die vordering kan sien. Dit is opbouend vir jou gees en gedagtes en so lekker om ‘n artikel te voltooi, ongeag wat dit is.
Ek is verskriklik bly dat my oumas daardie tyd al vir my die kuns aangeleer het.
Toortsie
toortsie.com 
Ek stem so saan met jou. Ekself het in st 1 sokkies gebrei en in die hoërskool leer hekel. Ure se genot.
LikeLiked by 1 person
Ek gebruik ‘n patroontjie wat ek by jou gekry het so baie.
LikeLiked by 1 person
https://toortsie.com/2015/04/06/die-storie-van-aspris-en-askies/
Die aspriskombersie se blommetjie, dink ek, is joune. 🙂
LikeLike
Sjoe, kan dit nie onthou nie. Foto asb?
LikeLike
Jy het daardie blommetjie in gare gehekel, seker een cm per blommetjie. Ek sal vir jou die patroon aanstuur as jy dit graag wil hê
LikeLike
Dan was dit die eerste blommetjie wat ek gehekel het. Dit het op die ou einde n skinkbordlappie geword en my dogter het dit geneem.
LikeLiked by 1 person
Ek dink ek het dalk ook so ‘n skinkbordlappie gehekel.
LikeLike
En ná Askies en Aspris het Astrant en Amandla gekom. 🙂
https://toortsie.com/2015/07/06/toortsie-se-toeka-tokkel-oor-kleur/
LikeLike
Toortsie,dis sooo waar! Om ‘n hekelpatroon te volg verg intellek en om met dun penne en gare ingewikkelde patrone te hekel is bo meeste mense se vuurmaakplek. Ek verkies nietemin hekel bo brei omdat 1 3-been hekelry dieselfde lengte as 3 gebreide rye oplewer.🤩
LikeLiked by 1 person
Ek stem saam. Elke winter koop ek die gelyke van n pak wol in verskillende kleure en hekel beanies vir die kinderhuis by ons. Het probeer brei maar dit vat te lank
LikeLiked by 1 person
Ek dink ook hekelwerk is vinniger as brei. As ek nou dink hoe lank ek verlede jaar met daardie Coronasjaal besig was wat ek gebrei het. As dit hekelwerk was, was dit binne ‘n week klaar. Maar albei is heerlik. Nou moet ek net daardie blommetjies klaarkry!
LikeLike
Handwerk is net vir my hopeloos te stadig. Ek dink my lus is op skool geblus toe ons vir ‘n jaar aan ‘n romp moes werk! En dan my skoonma wat besluit het as jy nie altyd ‘n handwerkie iewers het nie, is jy nie ‘n goeie vrou nie. Ek het probeer om ‘n “goeie vrou” te wees totdat sy my betig het oor ek “verkeerd” borduur.
Ek kan lees. Dit gaan vinnig en dis interessant en jy kan dit nie verkeerd doen nie. Nou hoop ek net dat ek ‘n paar kratte vol boeke en ‘n vergrootglas eendag saam met my ouetehuis toe sal kan neem!
Geniet julle handwerk!
LikeLiked by 1 person
Gelukkig het ek nog nooit ervaar dat jy jou neus vir handwerk optrek nie. Jy het darem altyd pragtige rokke gedra wat jyself vinnig gemaak het. 😁
LikeLike
My ma was ook maar ‘n breier. By haar soort van geleer maar nooit regtig kans gehad om te ontwikkel nie. My eerste jaar van skoolhou het die oom waarby elk geloseer het my gewys hoe mens brei sonder om joy hele hand te gebruik om wol oor te dra. Van daaraf was daar geen keer aan brei nie. Ek lees ook patroon en kannie sommer uit my kop uit brei of hekel nie. Toe byt die hekel gogga my nadat ek getroud is en by VLU aangesluit het waar ons artikels moes hekel. Fyn hekelwerk gedoen daardie tyd. Ook op n stadium stelletjies gehekel op aanvraag. Dis beslis ontspannend en ander kan maar neuse optrek, dit bly mooi werk.
LikeLiked by 1 person
Tans nou besig met fyne hekelwerk vir vlv. Ek dink elkeen het sy plek. Soms werk brei beter. Ander kere hekel. 😁
LikeLike
Ek hekel makliker in die somer omdat dit dun gare is. Winter is vir wol en breiwerk.
LikeLiked by 1 person
Ek wens ek kon hekel, maar het nooit geleer nie. Ek hou van brei – dit gaan stadig vir my, tog het ek verlede jaar twee komberse gebrei vir twee kleinkinders. Die ander twee sal moet wag tot die einde van hierdie jaar 🙂
LikeLiked by 1 person
Daar is niks fout met brei nie. 😁 Hekel is gou om aan te leer. 😊
LikeLike
Ek het nogal destyds vir my n boek gekoop om my te keer hekel, maar baie goeie voornemens sneuwel. Muskien kan ek dalk tog nog leer. Ek is mos nou n vlv tannie. Jou hekel- en breiwerk is pragtig, Toorts!
LikeLiked by 1 person
Dankie Seegogga. Nou moet ek my vingertjies wikkel om my hekelwerkie betyds klaar te kry!
LikeLike
Hekel laat my werklik ontspan. Om te dink die stokperdjie bevat net ‘n naald en ‘n bol wol! Wat jy met die grootste gemak oral heen kan vat. By my vorige werk het baie vroue gehekel – van jonk tot oud! Die kritici van hekel kan ook gerus google en kyk hoe gewild hekel oorsee is.
LikeLiked by 1 person
Ja dis ‘n lekker byderhand handwerkie.
LikeLike
Hoe praat jy na my hart. Ek kan brei en hekel en is versot daarop. Hekelgroep? Iemand na aan my het gevra dat ek vir haar iets hekel, maar sy nader my net wanneer sy my kan gebruik. En dan laat ek alles staan en help. Ek het nou so baie om te doen, dat ek dit nie vir haar gaan doen nie. Ek. oel as ek kon leer, kan ander ook. Dit is bevrydend.
LikeLiked by 1 person
Dit is nie moeilik om te leer doen nie.
LikeLiked by 1 person
Ek stem saam, dit is my manier van ontspan, nie werk vir ander nie.
LikeLiked by 1 person
Ek het baie onlangs eers geleer hekel en geniet dit baie meer as om te brei. Ek was altyd een van daai wat my neus opgetrek het, maar nou trek ek my neud op vir mense wat nie kan nie, hang seker maar af waar jy in jou lewe is nê?
LikeLiked by 1 person
😁👏🏻👏🏻👏🏻
LikeLiked by 1 person
Hekel kraai koning in my huis. Ek kan beide doen, maar verkies hekel, dit gaan mos vinniger as brei. Ek sou wat wou gee om die fyner werk te kon doen, maar dit is my nie beskore nie. Toortsie daarenteen kan enige iets doen waarop sy haar versier stel. Doe so voort!!!
LikeLike
Nee suster, jy skat jousrlf heeltemal te laag.
LikeLike
Ek hou vreeslik baie van hekel! Kan brei ook , maar is nie so lief daarvoor nie!
LikeLiked by 1 person