Wanneer is ‘n goeie tyd om te spaar?

Nou! Altyd nou! Wanneer jy ‘n ietsie het om te spaar. Of bulfase? O nee, nou is nie ‘n goeie tyd nie, die rand is in sy peetjie, die aandele val, of die aandele is nou te duur, ‘n mens koop nie nou aandele nie, of ek het nie eers geld om uit te kom in die maand nie, wat nog te sê spaar? Hoe moet ek gespaar kry?

Ja, die ekonomiese tye is sleg. Mense kry finansieel swaar. Vir party is dit seker regtig onmoontlik om nog te spaar ook. Tog sê Die rykste man in Babilon dat daar net een manier is om meer geld in jou beursie te kry, behalwe natuurlik nog harder werk, om, as jy tien goue munte inkry, jy een van daardie munte eenkant sit en nie uitgee nie. En dat jy dit elke keer moet doen. Dan gaan die geld in jou beursie meer raak.

Soos ‘n wyse ou plaaswerker een keer, baie jare gelede vir my gesê het dat ‘n mens nie jou lammerooie moet slag nie. Dis seker een van die beste geldraad wat ek in my lewe gekry het en dit van ‘n persoon wat nie eers kon lees en skryf nie. Moenie jou lammerooie slag nie. Vir hierdie boervrou het dit sin gemaak. Jou lammerooie los jy uit sodat hulle vir jou nog meer lammers kan gee.

Ek glo aan die bietjie-afknyp-wanneer-jy-kan-ding. Selfs in tye wanneer dit finansieel met jou baie moeilik gaan. As dit moontlik is. Dis dalk daardie één bederfie wat jy so verskriklik nodig het, wat jy opgee en daardie geldjie eenkant sit. Soos die rykste man in Babilon sê, is dit ook die raad wat ekonome nog altyd gee, dat jy, van die dag af wat jy begin geld verdien, minstens 10% moet wegsit. Lammerooie. Wat jy nooit slag nie. Waaraan jy nooit raak nie. Ook nie aan die lammers wat gebore raak uit daardie ooie nie.

As dit maar klein bedraggies is, kry vir jou ‘n spaarrekening. Of ‘n geldmarkrekening as jy kan. Maar as jy enigsins in aandele kan belê, doen dit. Daar is baie oulike fondse beskikbaar waar jy ‘n kleinerige bedraggie per maand kan wegsit. Of, groter enkelbedrae wanneer jy kan. En as jy kan, dink ernstig daaraan om ‘n bietjie geld in die buiteland ook te sit.

Hoekom glo ek nou is die beste tyd? Nie nou, 04/08/2020 nie, maar die nou. Wanneer jy die geld het. Ongeag of die rand swak is of die aandele te duur. Want, it’s not about timing the market, but time IN the market. Jy kan die groot slag met aandele slegs slaan as jy aandele het. Ja, jy kan groot verloor met aandele, maar as jy dit daar los, sal dit deur die slegte tye kom en sal hulle vir jou beloon. As jy die temperament het om daarmee saam te leef.

Knyp af. Kom in die gewoonte. Spaar nou. En vergeet van daardie geld. Moenie dat dit jou pla nie. Los dit uit. Jy gaan bly wees. En onthou om gereeld nog by te sit sodat dit groei en groei. Vir oudag.

Toortsie