Ek sien dat daar in April ‘n A-Z uitdaging is. ‘n Mens moet iewers inskryf en dan elke dag van die week, Maandag tot Saterdag, oor ‘n sekere letter skryf. Sondae het jy af.
Ek het besluit om wel deel te neem, maar nie in te skryf vir die uitdaging nie, om ‘n hele paar redes. Ek wil in Afrikaans skryf, wat ek seker is toelaatbaar is, ek wil nie gedruk wees om elke dag te skryf nie, ek sal dus skryf wanneer ek wil en ek wil dit afwissel met my ander bloginskrywings. Hierdie uitdaging sal dus ‘n bietjie langer neem as wat dit moet.
Die tema wat ek gaan probeer, is idiome. As bron gebruik ek vandag Mieliestronk se webwerf.
Idiome met A
Die eerste een waaraan ek kan dink, is dat die Appel nie ver van die boom af val nie. Dit verwys na kinders wat baie na hulle ouers aard of lyk. ‘n Mens kan familietrekke sommer van ver af sien. My arme seun, toe nog ‘n tiener, stap een dag op die strand, toe ‘n wildvreemde oom na hom toe kom en vir hom vra of hy familie van ons is. Daardie appel het beslis nie ver geval nie!
Iets wat natuurlik teen my grein is, is as iemand se oggend- en aandpraatjies nie ooreenstem nie. Ek HAAT dit. Dit is natuurlik deel van my persoonlikheidstipe, waar die waarheid ononderhandelbaar is. Dus, as ‘n persoon uit verskillende monde praat, wanneer hy vandag die een storie het, maar môre ‘n ander, het hy my klaar verloor.
Soms kan ‘n mens iemand sommer net bel, sms, whattsapp, of selfs ‘n brief skryf, of watter hulpmiddel jy ook al wil gebruik. Jy kan ‘n outydse boodskap stuur, of jy kan nuwerwetse elektronika gebruik. Soms het jy nodig om van aangesig tot aangesig met iemand te praat. Dan moet jy by hom sit, in sy oë kyk en direk met hom praat. By hom wees as jy met hom praat.
Aanstaltes maak is ‘n idioom wat ‘n mens nie meer so baie hoor nie, tog was dit baie in my ouerhuis gebruik. Ons moet begin voorbereidings tref, of regmaak om te vertrek.
Jy kan ‘n aap in die mou hê, en stilweg slinkse streke verberg, of jy kan die aap uit die mou laat, wanneer jy ‘n geheim verklap. Wanneer jy jou behoorlik vererg, kan jy die aapstuipe kry.
Deesdae wat menseregte die Alfa en die Omega is, en jy nie durf waag om ‘n opmerking te maak nie, gaan hierdie idioom nie meer werk nie: Al dra ‘n aap ‘n goue ring, hy bly steeds ‘n lelike ding. Jammer, menseregte of te nie, die waarheid is die waarheid. Gelukkig het elkeen van ons die keuse of ons ‘n aap van onsself wil maak, of nie!
Watter A-idiome wil jy graag byvoeg?
Groetnis
Toortsie
Agter-os kom ook in die kraal. Aanhouer wen. Afrikaans bly darem maar so kleurvol.
LikeLiked by 2 people
Ek vermoed ek het al voorheen a-z oor idiome gedoen. Wel, hier gaan ek weer!
LikeLike
Dis reg. Was dit idiome of was dit net n Afrikaanse A-Z. Ek dink ons het dit dieselfde jaar gedoen.
LikeLiked by 1 person
Ek het al ‘n hele paar keer a-z gedoen.
LikeLiked by 1 person
Wel Februarie is verby maar n ware Adonis bly maar mooi om na te kyk
LikeLiked by 2 people
😊 Kyk he skerp is jy op ‘n Maandagoggend!
LikeLike
Geniet die uitdaging! Gisteraand se Sondagdrama op KykNet het netso baie idiome ingehad. Ek het het dit baie geniet.
LikeLiked by 1 person
Dankie
LikeLiked by 1 person
Deesdae moet mens maar oppas vir die aapstories. Dalk moet ons nuwe name vir ape en bobbejane uitdink. Oulik geskryf, Toortsie!
LikeLiked by 1 person
O aarde! Gaan ek in die moeilikheid kom? Dít gebeur tog so maklik.
LikeLiked by 1 person
Hy ken nie ‘n A voor ‘n B nie. (Hy is glad nie geleerd nie.) Hy sê nie a nie. (Hy praat glad nie.)
Wie A sê, moet ook B sê. (Wie met ’n ding begin het, moet daarmee aanhou.) Van A tot Z. (Van die begin tot die end.) Ek dink nie ek gaan hierdie jaar die A-Z doen nie. Om elke dag ‘n blog gereed te hê en dan nog by vreemde webtuistes ook te gaan lees, begin nou na werk klink. Maar, dis nog vroeg in die jaar en dis somer – ek het ander dinge wat my besig hou – ons sal maar sien.
LikeLiked by 1 person
Aartjie na sy vaartjie….of het jy dit klaar gesê?
LikeLiked by 2 people
Ek het nog nie.
LikeLiked by 1 person
Kon gisteraand nie slaap nie….en wat woel in my kop? Idiome!!! As is verbrande hout. As die kat weg is is die muis baas. Amper maar nog nie stamper. Agteros kom ook in die kraal. 😔
LikeLike
En al daai idiome het met my te doen, want as ek nie soveel ander goeters gedoen het toe ek Saterdag moes brei nie, sou ek snags kon slaap, maar as ek nie die bredie gekook het en tert gemaak het nie, sou ek nie iets vir die onverwagte gaste gehad het nie. Amper klaar wás nog nie stamper nie, maar die agteros hét nou in die kraal gekom en my breiwerkies het betyds klaargekom.
LikeLiked by 1 person
Jou stuiwer in die armbeurs gooi, van bakboord na stuurboord stuur, al dra ń aap ń goue ring bly hy nog ń lelike ding, nou hiervan weet ek so min soos ń kat van safraan. Mal oor idiome.
LikeLiked by 1 person
Jy weet duidelik meer as’n kat van safraan. 😁
LikeLike
Ek is mal oor idiome
https://seegogga.com/category/idioomstories/
LikeLiked by 1 person