Banting sopresepte

Iemand vra vir Google vir Bantingsopresepte en natuurlik is die regte plek om te soek, net hier!

Toe ek begin Bant het, was sop vir my ‘n groot uitdaging. Ons boere eet graag sop in die winter en ek het graag boontjie- en ertjiesop gekook. Toe kom Banting en daar vlug boontjie- en ertjiesop by die deur uit!

Hoe nou gemaak?

Nou is dit amper vier jaar later sedert ek begin Bant het en is sop glad nie meer ‘n probleem nie. So hier en daar het ek van my sopresepte hier op die blog beplaas, en as jy op die ingekleurde woord kliek, sal jy by dit uitkom:

Daar is ‘n baie lekker Spinasie- en botterskorsiesop.

Lank gelede het ek ‘n bloginskrywing gemaak oor sop, dit was voor Banting. Dis geplaas met die gedagte aan ‘n blogmaat wat ‘n vegetariër is, dus is al daardie resepte nie Bantingviendelik nie. Gaan kyk gerus daarna, daar is wel van die resepte wat jy net so kan gebruik, maar ek sal dit natuurlik ‘n bietjie wil opkikker met spek of room om die voedingswaarde te verhoog. Die boontjiesop is beslis nie geskik vir Banting nie, maar die Weigh-Less vrye groentesop kan jy net so maak, gooi net room by! Die vinnige broccolisop sal ook kan werk, maar ek het deesdae ‘n baie lekkerder broccolisop spesiaal vir Banters, wat ryk en romerig is.

HIER kan jy kyk vir ‘n heerlike groentesop, geskik vir Banting. Ryk en lekker! Mmmmmm

En dan kan jy natuurlik in Toortsie se Bantingboerekos kyk vir ‘n heerlike Broccoli- en speksop, ek was al op die TV met hom; die Banting Spinasie-botterskorsiesop, Groentesop en Sampioen- en speksop. In Hier’s die Toortsie weer! is daar ‘n Ryk en romerige blomkoolsop en ‘n Hoender- en bloukaassop. Sjoe! Hoe lus kry ek ook nou vir sop, dit lyk juis of die winter lus het om nader te kruip.

Beide hierdie boeke is tans op promosie en kan vir ‘n spesiale prys by my bestel word.

Intussen, geniet jou Banting. Lekker eet!

Groetnis

Toortsie

Toortsie by Finesse: Op die spore van die meesters met Uber

Toortsie se Facebook Page

Toortsie se Bantingresepteboeke Facebook page

Toortsie’s English Blog Posts

Kruinsig Plaasakkommodasie, Riversdal

Toortsie by Finesse voelgoed tydskrif