Die eerste woorde, of is dit die laaste?

Ek hoor duidelik in my kop: ‘Die duiwel soek om aan te kla, terwyl die Here soek om te vergewe.’

Ek sê: ‘O, dít moet ek onthou. Wie se woorde is dit?’

Toe word ek wakker.

Ek het ‘n bedrywige droomnag gehad. Was dit dus die heel laaste woorde van my droom, of die heel eerste gedagte van die dag, of iets tussenin?

Ongeag watter een van die drie dit was en of dit ‘n mengsel was en of dit my eie droomwoorde was en of dit woorde is wat iemand anders gesê het, wie ek nou nie weet wie dit is nie, dis ware woorde wat dalk vandag by my gaan bly.

Want dis ware woorde.

Die duiwel is altyd daarop uit om mense aan te kla, om mense sleg te maak, skuldig te verklaar, terwyl Jesus die Een van liefde is. Hy is die Een wat ons wil red, wil vergewe, wil liefhê, as ons Hom net wil toelaat. Hy is die Een wat vir ons ‘n lewe van oorvloed wil gee, wat vir ons in hierdie deurmekaarwêreld ‘n rigtingwyser wil wees, wat ons hand wil vashou, wat ons deur krisistye wil help. Hy is die Een wat vir ons ‘n toekoms wil skep, ‘n verwagting.

Hoekom wil ons Hom dan nie toelaat om dit te doen nie? Hoekom bly ons Hom dan verwerp, ontken dat Hy bestaan? Hoekom gooi ons Sy goedheid in Sy gesig terug?

Toortsie

Toortsie by Finesse: Toe kom die reën

Toortsie se Facebook Page

Toortsie se Bantingresepteboeke Facebook page

Toortsie’s English Blog Posts

Kruinsig Plaasakkommodasie, Riversdal

Toortsie by Finesse voelgoed tydskrif

Transformation Prayer Ministry: Bredasdorp en Riversdal