Advertisements

As Afrikaans sou uitsterf – lê jou eier oor jou erfenis

Hul vra ons om ‘n bietjie te dink: as Afrikaans sou uitsterf, wat sal jy mis?

My hele lewe is Afrikaans. My huistaal is Afrikaans, my gesin is Afrikaans. Ek bly in ‘n dorp waar ons Afrikaans praat. Ek kan my nie indink hoe ons mense sal regkom sonder Afrikaans nie.

Ons straatname is Afrikaans. Wat word van Breëstraat, Parkstraat, Rivierstraat, Kerkstraat? En plaasname? Uitkyk. Gaan Boschfontein, wat eintlik Hollands is, Bush Fountain word? Karsrivier Kars River? Dan praat ons nie eers van dorpsname nie! Riviersonderend. Putsonderwater. Verlorenfontein. Bredasdorp. Dit is Afrikaanse name wat ons net op geen manier kan verEngels of verwatookal nie!

Ek vry in Afrikaans. Ek kan my net nie indink om vir my man in enige ander taal as Afrikaans te sê hoe ek oor hom voel en dat dit dieselfde sal wees nie.

Afrikaanse humor. Het julle al probeer om ‘n Afrikaanse grap in Engels te vertel? Dit wérk net nie? Soos die destydse Minister van Landbou, wat gesê het die Kapenaars het nie bogrond nie, nie ondergrond nie, maar darem ‘n bietjie agtergrond. Vertaal dit gou ‘n bietjie na Engels! Toe!

Ek kan nie kosmaak in Engels nie. Ek het een Engelse resepteboek iewers gekry en hy het lankal op die ashoop beland. Daarteenoor het ek ‘n stapelvol Afrikaanses. Geen vergelyking nie.

Toortsie probeer soms in Engels blog. Mensdom! Wát ‘n gesukkel!

Ek dink ek het my punt gemaak. Ek droom in Afrikaans, lag in Afrikaans, speel in Afrikaans, het lief in Afrikaans, word kwaad in Afrikaans, gaan kerk in Afrikaans, dien God in Afrikaans. Afrikaans is my taal. Ek is lief vir Afrikaans.

Wat van jou? Sou Afrikaans uitsterf, wat sou jy mis? Skryf dit op jou blog. Skryf elke dag iets anders op jou Facebook. Op Instagram. Op Twitter. Vertel dit om die braaivleisvuur. Wat is Afrikaans vir jou? Sê dit. Maak Afrikaanssprekendes bewus van ons mooi taal en dat ons dit moet oppas en liefhê en versorg sodat dit kan groei en ons nageslag ook nog die voordeel daarvan kan hê. Merk dit elke keer #Afrikaans #Onmisbaar

En terwyl ek dan nou my eier kan lë oor erfgoed, Afrikaans is my erfenis, en soos die res van my erfgoed, probeer ek mooi kyk na my taal. If you are Afrikaans speaking, be loyal to your ancesters: Speak Afrikaans! 😁

Ek daag jou uit!

Toortsie

Verklaring oor my taal.


Om die inskrywings van verskillende bloggers in Lê-Jou-Eier te geniet of om self ‘n eier te kom lê wat ons kan uitbroei en grootmaak, klik op die volgende InLinkz skakel:

Vir die reëls van hierdie eier-boerdery, om raad te kry oor hoe om deel te neem en om elke week se aankondiging van die nuwe onderwerp te sien, besoek die volgende skakel by Dis Ekke. Onder hierdie kategorie, kyk na die blogposte Lê-Jou-Eier: Reëls (2017-08-22) en Lê-Jou-Eier: Hoe neem ek deel? (2017-08-22). 

Advertisements

About Toortsie

'n Flitsliggie wat oral inskyn, ook waar dit soms ongemaklik is... A Toortsie is a small flashlight, like a torch.
This entry was posted in Overberg, Verskeidenheid Onderwerpe and tagged , . Bookmark the permalink.

43 Responses to As Afrikaans sou uitsterf – lê jou eier oor jou erfenis

  1. Wat sal ek mis? Idiome, sêgoed, slagspreuke met digterlike vryheid geskryf, ‘n paar raaksê vloekwoorde, byname wat die spyker op sy kop slaan, Namakwaland se plantname – hondepisbossie, pietsnot. Kom ons gebruik daardie huts/hutsmerke/hutstekens (hashtags [#] in Afrikaans). Dankie Toorts, maar ek mag darem soms in Engels blog?

    Liked by 2 people

  2. Kameel sê:

    Ek stem…. Afrikaans is ‘ n lekker spreektaal en daar is dinge wat net in Afrikaans gesê kan word; maar ai Toorts jy weet mos ek sukkel nou met twee tale…. en gooi hulle met tye sommer saam in ‘n sin.

    Liked by 1 person

  3. Ek is mal oor my taal, dit is wie ek is, hoe ek my sê wil sê.
    Stem saam Hester ek sal beslis die lekker beskrywende woorde van my taal mis.

    Liked by 2 people

  4. AwethentiQ sê:

    Hoe sing Baardskeerdersbos Orkes?

    “Sannie van Pa kan Ingels praat, paliehoe!” (parlevouz….Frans!!)

    Liked by 1 person

  5. Sjoekie doekie, nou praat jy! Ek word gedwing om Engels te gebruik maar Afrikaans bly steeds my moeder taal, o skoonste taal. Waar kan mens beter kry as boerewors en braaivleis, lekker sakkie-sakkie op n boeredans met boeremusiek. Kan aangaan en aangaan.

    Liked by 1 person

  6. Ja. Afrikaans is altyd bo!!

    Like

  7. Terug pieng: Lê-Jou-Eier: As Afrikaans sou uitsterf … – Dis Ekke

  8. Nikita sê:

    Ek sal letterlik ALLEs mis! Die taal is absoluut te wonderlik. Ek kan aan soveel beter woorde in Afrikaans dink om iets te beskryf wat Engels nie het nie. Afrikaans het ‘n kreatiwiteit wat ek nie in Engels vind nie. Jy kan jouself soveel beter uitdruk en al die uitdrukkings wat jou soms so laat lag van pure snaaks-kreatief. Ek sal sorg dat Afrikaans nie uitsterf nie – nie terwyl ek lewe nie. 🙂

    Liked by 1 person

  9. Afrikaans bly die beste…..en die lekkerste om te praat en te luister.

    Liked by 1 person

  10. Toortsie, doen ons asseblief ‘n guns en las hierdie blog van jou aan by ons onderwerp vir hierdie week? Onthou net om die paddatjie paragraaf se skakel reg te maak onderaan jou blog.

    Like

  11. Terug pieng: Lê jou eier: As Afrikaans sou uitsterf | Toortsie, Kameel en Bokbaaivygie se blog

Gesels saam, asseblief!

Verskaf jou besonderhede hieronder of klik op 'n logo om in te teken:

WordPress.com Logo

Jy lewer kommentaar met jou rekening by WordPress.com. Log Out / Verander )

Twitter picture

Jy lewer kommentaar met jou rekening by Twitter. Log Out / Verander )

Facebook photo

Jy lewer kommentaar met jou rekening by Facebook. Log Out / Verander )

Google+ photo

Jy lewer kommentaar met jou rekening by Google+. Log Out / Verander )

Connecting to %s

%d bloggers like this: