Ek het 2 honde van dieselfde ras, noem hulle ouhond en jonghond. Ouhond is 9 jaar oud, jonghond 6 maande. Ouhond is nie aldag lus vir jonghond se gekejakker en karnuffel nie en vele aande, vermoed ek, mag jonghond nie by ouhond lê nie.
My seun het ook ‘n hondjie, jonghond se sussie. Wanneer sy by is, is ouhond jonghond se sussie se maat. Sussie mag omtrent bo-op ouhond lê, maar jonghond mag nie naby kom nie.
Vanoggend was dit D-dag. Jonghond moes veearts toe. Ons wil nie oor 6 maande 9 klein hondjies ook nog op die werf hê nie.
Vroegoggend roep ek vir jonghond, sy vertrou nie die vrede nie en ek moes haar letterlik dra kar toe.
Ouhond bly alleen agter. Die gesig hang, skouers hang, skewe stert hang. Heeldag hang hier ‘n wolk oor ons erf. Ouhond eet nie ‘n stukkie nie.
Laatmiddag gaan haal ek vir jonghond. Sy is seer en skaam. Die stert swaai sulke klein swaaitjies. Ons moet haar in die kar intel en weer uittel. Sy vertrou steeds nie die vrede nie en wil nie in die huis inkom nie en dis koud en die wind waai.
Wie sal haar oorreed? Ouhond! Dis ouhond wat haar gaan haal, met liefde en geduld hanteer, wat haar bring tot in die sitkamer waar hulle kussings lê. Ouhond gee ook sommer glad nie om dat jonghond ‘n bietjie wyer lê as gewoonlik nie, en bly waak oor haar. Te mooi lê die tweetjies sy aan sy.
Dalk het ouhond vandag ‘n bietjie oor haar ongeduldigheid gedink! Wie weet?
Toortsie se Bantingboerekosboek Facebook page
Toortsie se Facebook page
Finesse Blogger of the week
Toortsie by Finesse: Skemerkelkie
Toortsie by Pinterest
Is dit nie net te wonderlik nie. Hoe hulle net weet. Ons Emma weer, wil heeldag so na as moontlik aan kleinste seuntjie bly lê. Boetie is cronies siek en kry volgende week ń operasie. Asof Emma hom oppas. Sy verwilder arme labrador heeltyd, wat eintlik die kleinkinders sn is, en so verwyl sy haar dag. Paraat. Naby hom.
LikeLiked by 1 person
Te mooi! Wel, almal het die nag oorleef. Nou moet ons net probeer om vir jonghond stillerig te hou vir ‘n paar dae.
LikeLike
O hond is natuurlik baie lief vir jong hond, maar kinders moet weet wie’s baas. As kindjie egter seergekry het, moet hy /sy mos liefdevol vertroos word.
LikeLiked by 1 person
Net so. Dit was vir my ook opmerklik hoe onseker jonghond was toe ouhond nie by was nie. Dis of sy net nie weet hoe om te maak nie.
LikeLike
Arme hondjie is “verkeerdgemaak” by die veearts. Ek sit en lees juis een van James Herriot se vele boeke, wat ek al uit my kop uit kan opsê! Hone, en ook katte, se aanvoeling is eg en erg. Ook perde s’n.
LikeLiked by 1 person
Dit was regtig ontstellend hoe die twee gister opgetree het. Nou us hulle oraait.
Toe my broer een nuwejaarsdag dood gelê het en ek op my bed gelê en rou het, het my labrador die hele tyd voor my kamerdeur wag gehou. Tot ek beter gevoel het, toe het sy in die son gaan lê.
LikeLiked by 1 person
Toe ek gestremd en gefrustreerd was, was dit die pointer en die labrador wat my kom opsoek het as ek van binne gebloei het. Hulle het my emosionele pyn op ‘n myl aangeoel en my voete kom lek om my te troos.
LikeLiked by 1 person
Diere het ‘n fyn aanvoeling vir emosionele en fisiese pyn van hulle huisgenote. Boonop is hulle goeie vertroosters.
LikeLiked by 1 person
Ja hulle is goeie vertroosters. En net so versigtig sy gister vir my was, net so oorweldigend is sy vanoggend in haar liefdebetoning om vir my te sê dis okay. Tog soek sy ook nog troos, sy klim amper bo-op my, waar sy gewoonlik net met haar koppie en een poot op my skoot lê.
LikeLiked by 1 person
Ek onthou dat ek die hele nag regop gesit het met my klein katjie toe sy gesteriliseer is. Ek dink hulle het haar te veel narkose gegee; sy is ‘n klein fyn ou dingetjie en sy was so siek, siestog.
LikeLiked by 1 person
Siestog.
LikeLiked by 1 person
Fijn, ik hou van mensen die van honden houden.
Ik heb een Duitse Dog ( Men noemt ze sedert de tweede wereldoorlog Deense Dog, maar in de stamboom staat nog steeds Duitse Dog)
Zijn naam is Jefke
Groetjes en nog veel vriendschap voor jouw honden
Theo
LikeLike
Janee, selfs “grumpy old women” weet wanneer om op te hou mor!
LikeLike
Ag moederliefde dis so oulik!
LikeLike