Hierdie week val ek uit die bus uit wat scrapydo se toeka-tokkel “Sopkombuis,” aan betref. Ek weet te min daarvan af om eers ‘n poging aan te wend.
Ek het mos hierdie liefde gehad om alles wat wild is te ry…. perde uitgesluit. See het beteken jy ry branders op ‘n “boogy” bord uit; hoe wilder hoe beter. Om net in die branders rond te spring is nie my idee van pret nie. Net voordat Menieres my wêreld onderstebo kom draai het, verdrink ek amper in Richardbaai, en my seeavonture – behalwe met ‘n loopstok langs die see stap – kom tot stilstand na Menieres.
Tien jaar later en ‘n diep verlange om net eenkeer weer met ‘n brander die see uit te ry, neem van my besit. My liggaam is nie meer diè een waarmee ek sonder skaamte, met ‘n kostuum rondgeloop het nie; maar dit is ‘n struikelblok wat ek sal oor wanneer ek daarby kom, besluit ek. Verlede week neem Ken die bul by die horings en ry met my Margate toe. “Gaan koop vir jou ‘n kostuum sodat jy daardie brander kan gaan ry,” sê hy. In die aantrekhokkie staar die waarheid my in die oë; ek sien te goed wat die jare aan my liggaam gedoen het. Net daar begewe my moed my, maar Ken neem aksie, betaal vir die kostuum en pakkie in my hand loop ek by die winkel uit. Nou is daar nie meer omdraai kans nie – die brander doem soos ‘n reus voor my op.
‘n Paar dae gelede ry ons Uvongo toe. Die see is rof, met sterk branders. Vroeër jare sou dit idiaal gewees het, maar nou lyk dit vir my na ‘n groot bedreiging. Ek stroop my klere van my af, en daar staan ek met kostuum op die strand. Ten aanskoue van vele oë word daar eers ‘n foto geneem; dit moet op ons huisgesin se “whatsapp” groepie kom, sodat die kinders kan sien hul ma het die groot stap geneem. “Hou my hand styf vas,” sê ek vir Ken toe ons die water instap. Die probleem met Menieres is, sodra die water om jou voete begin kolk is jy dadelik van balans af, en rigtingloos. Ek slinger soos ‘n dronk persoon rond. Ken hou so wat hy kan, maar ‘n brander slaan my onderstebo, en ek trek hom saam met my. Nog voordat ons kan opkom, slaan ‘n volgende een oor ons, en rol ons in die sand rond, en nog een is bo-oor ons koppe. Ek gooi handoek in, en al slingerend – met seesand wat sulke bulte in my kostuum maak – kom ek by die kampstoel terug.
Vanoggend net na ses kom maak Ken my wakker. Dit is ‘n lieflike dag; ons moet strand toe sodat ek die brander kan gaan ry. Voor sewe is ons op die strand, en die see is kalm. Ons moet diep instap om by die branders uit te kom. Nodeloos om te sê ek kom so dronk soos ‘n lord daar aan. “Hierdie een,” sê Ken, en gee die “boogy” bord ‘n stoot. Dis ‘n mislukking en ons probeer weer. “Het jy vergeet hoe om te ry?” vra Ken, “druk die neus van die bord in die water.” Die volgende brander, en ek druk die neus so diep dat ek bollemakiesie slaan. By nou is ek pootuit, en die strand lyk myle vêr. Die derde brander is ‘n sukses, maar nie sterk genoeg om my tot op die strand te neem nie. Vir vandag is dit genoeg, hyg ek, en maak uitasem vir die strand.
Ek vra net een perfekte brander; daardie een wat my van daar doer met vol spoed tot op die strand sal uitneem. Ek sal weet wanneer ek hom gery het!!!
O, watter wonderlike ondersteuning kry jy van Ken! Hou aan totdat jy daardie volmaakte brander kan ry – en kom vertel ons?
LikeLiked by 1 person
Sonder hom sou ek dit nooit gewaag het nie Frannie. Ek hoop vir sy part ook ons kry daardie brander.
LikeLiked by 1 person
Môre gaan dit nog ‘n lekker dag wees. Wees gereed! Accuweather sê die weer gaan begin draai teen Donderdag. Ons pak in vir ‘n Gauteng rit en gaan die see mis.
LikeLike
Dankie. Hopenlik kry ek daardie brander. Mooi ry en geniet julle “kuier.”
LikeLiked by 1 person
Dit klink wild en woes.
LikeLike
Dit is wat die see is 🙂
LikeLiked by 1 person
Kameel, jy is my HERO! En jou KEN saam met jou!
Love youuuu!
LikeLike
Glimlag ek nou 🙂 Voel heel lekker om iemand se hero te wees…. al bons die ou hart maar benoud daar in die water. Mooi dag vir jou.
LikeLike
So bly jy kies die see en die pret bokant hangups oor jou lyf! So baie mense mis al die pret net omdat hulle skaam is viir mense wat nie eers vir hulle kyk nie. Ek hoop jy kry darie brander en ry hom lekker!
LikeLiked by 1 person
Dankie seegogga. Saam met die klere uittrek het daar ‘n gees van vryheid gekom.
LikeLiked by 1 person
LEKKER
LikeLike
Nou vir die regte een 🙂
LikeLike
Fantasties!!
LikeLiked by 1 person
Die ou lyf is maar seer en styf vandag. 🙂
LikeLiked by 1 person
maar dis mos n lekker seer!
LikeLiked by 1 person
Pragtig man. Oulik geskryf.
LikeLike
Dankie. Dit eis maar sy tol… stokstyf vandag, en goed seer.
LikeLike
Nou klap ek hande vir jou! Jy is beslis n wenner! Dit klink vir my baie lekerder as die sopkombuis. Ek is so bly jy durf dit aan en dat Ken jou so mooi bystaan. Wat sal jy tog sonder so n wonderlike man gedoen het? Jammer ek lees nou eers maar my week was so vol van ander dinge dat ek net nie tyd gehad het nie. Dankie dat jy dit geskryf het dit is n oorwinnings fliek op sy eie.
LikeLike
Ai, kry so ‘n smakie van hoe die celebs moet voel oor goeie kommentaar 😆 Dink die fliek sou meer ‘n komedie gewees het…. maar dankie. Vertrou jou week gaan geseënd wees.
LikeLiked by 1 person
Komedie is goed vir die gesondheid. Jy moet ook n heerlike week hê. Wanneer gaan jul huistoe of is jul al weer tuis? Ek begin my tweede werksweek! Dis n hele aanpassing maar heerlik.
LikeLiked by 1 person
Plan is om volgende Maandag terug te gaan. Gee my ‘n week om daardie brander te ry… maar die weer speel voorwaar nie saam nie. Ontsettende winde wat waai, of mistroostige weer. Bly jy geniet jou werk. Sluit die skole nie ook nou kort voor lank nie? Dan is jy seker af?
LikeLike
Skole sluit 15e dan is ek af tot Februarie.Volgende week gaan klomp van groter kinders weg met n kamp vir die week. Dan gaan dit rustig wees. Jy moet die week geniet en ek hoop die brander gee jou jou kans.
LikeLiked by 1 person
Koud hier vandag…. en WIND. As ek ooit gewens het ek kan by see bly het hierdie vyf weke van wind my daarvan genees.
LikeLike