Sekere tye van die jaar kry ek meer oproepe waarin ek werksbevestigings moet doen. Dit kom daarop neer dat een van ons werkers iets op skuld wil koop en daardie besigheid my dan skakel om te bevestig dat die persoon wel by ons werk.
Dalk skryf ek hierdie stuk sommer vir myself ook, want as die winkels bel vir ‘n werksbevestiging, is ek sommer al, as eerste reaksie, suur.
Wat ek, en elke persoon wat vir iemand werk, nooit mag vergeet nie, is dat jy daardie firma verteenwoordig. Sodra jy die telefoon of ‘n kliënt of epos hanteer namens die firma, IS JY DAARDIE FIRMA. Jý bepaal wat die ander persoon se idee van hierdie firma is. Dit beteken, jou vriendelikheid, hulpvaardigheid, slapgatgeit, knorrigheid, kanniewarriehouding, bepaal of die kliënt jou firma as vriendelik/hulpvaardig/slapgat/knorrig/kanniewarrie gaan ervaar.
Ekself antwoord deesdae die foon met “hello” wat eintlik baie swak is, maar ek doen dit om ‘n spesifieke rede. Ek wil maar eers hoor wie my bel voor ek myself te goed bekendstel. As ek egter vir iemand bel, stel ek myself in die eerste plek voor en waaroor ek bel. Wanneer ek egter wil stuipe kry, is wanneer iemand van ‘n besigheid my bel, konfidensiële inligting vra, en nie eers die ordentlikheid het om te sê: “Goeie môre, ek is xxx van hierdie firma en ek bel in verband met xx” nie. “Hello. Werk Piet Pompies by julle?”
Ek vra nou een dag vir ‘n dame wat bel of sy nie dink dat sy haarself darem net aan my moet voorstel voor sy sulke persoonlike inligting begin vra nie, waarop sy toe op my begin skree dat ek nie vir haar moet leer hoe om haar werk te doen nie. Ek het maar die foon saggies neergesit. Dis tog nie ék wat aan háár iets wil verkoop nie, dis sý wat iets aan een van mý werkers wil verkoop! Ek wou tóé al hieroor skryf, maar het besef dat sy heel waarskynlik nie hier gaan lees nie. Dalk lees haar werkgewer?
Ja, telefoonetiket, emailetiket, kommunikasie-etiket is aan die glip. Dalk kan ek en jy wat hier lees, dalk iets hieraan doen deur in ons eie huis te begin vee? Deur nie self ook te verval nie. Deur ons werkers wat kommunikasie doen, te probeer oplei. Ek besef dis amper ‘n onbegonne taak, maar ons kán iewers begin. Probeer bou, eerder as om af te breek?
Dis ‘n oerwoud daar buite! Sterkte!
Toortsie
Toortsie se faceboekblad
toortsie.com 
Jy’s heeltemal reg, die persoon wat bel moet homself behoorlik voorstel. My telefoon het ‘Caller ID’ en as die nommer aan my onbekend is, is ‘hello’ ook my manier van antwoord. Maar dan is telebemarkers deesdae so goed opgelei, hulle begin die gesprek sonder uitsondering met: “Good morning to you Mrs … , how are you today?” Dan is my antwoord: “I’m well, thank you for asking,” en ek plak die foon neer. Ek is vreeslik onopgevoed. SIES Hester.
LikeLike
Ja. Mens ruik hulle op ‘n afstand! Ek antwoord ook goed dankie, maar vra nie terig hoe dit gaan nie. Siestog hulle is so ordentlik! Dan bly ek doodstil en sodra ek vir seker weet dis ‘n telebemarker sit ek ook maar die foon neer.
Truecaller is fantasties. Ek blok dan daardie nommer.
LikeLiked by 1 person
Ek wonder of daar nie ‘n kompetisie tussen telebemarkers is oor wie die gesprek die langste kan uitrek nie, en wie hou die rekord vir die kortste gesprek?
LikeLike
hehe, dis seker ook maar ‘n goor werk
LikeLike
Hulle is ten minste goed opgelei! Lees die woorde van ‘n rekenaarskerm af.
LikeLiked by 1 person
Ek dink nie ek sou dit kon doen nie. Die eerste kliënt wat ongeskik is met my, sal ‘n paar lelike woorde toegevoeg word!
LikeLike
Ek sou ook nie kon nie. Ek kry hul eintlik jammer.
LikeLiked by 1 person
Ditto!
LikeLike
Ek is altyd baie vriendelik,want my kind het by so ‘n call center gewerk en hulle word soms vreeslik verbaal mishandel.Daardie bietjie vriendelikheid maak dit dan sommer ook beter wanneer mens nee sê vir die produk of wat ookal.
LikeLike
Skaam maak jy my nou.
LikeLiked by 1 person
Ek stem saam met die Hello voordat ek my inligting gee. Hulle moet vra of ek so en so is voordat ek enige antwoorde gee.
LikeLike
Ek kry die call center mense ongelooflik jammer…. maar wil nie in ‘n gesprek met hulle betrokke raak nie. Wonder hoe voel hulle na ‘n werksdag? Liewe, ek kannie die hele wêreld onder my vlerk neem en gelukkig probeer maak nie….. maar so is ek gesnaar. 2
LikeLike
Ek voel presies soos jy. Dis dalk al werk wat hul kon kry, maar dit beteken nie hul moet mý aanmekaar bel nie! Ek het regtig genoeg om te doen.
LikeLike