Toe ekself ‘n ma van klein kindertjies was, het ek verkies dat my kinders in hulle eie bedjie slaap. Op ‘n dubbelbed was daar net nie plek vir ‘n pa wat sy helfte vol lê, een of twee kinders wat elkeen sy volle plek wil gebruik, en nog vir my ook nie. Ek was doodmoeg as dit slaaptyd raak, so ek wou graag darem net my eie lêplekkie hê. Daar was wel ‘n bed by hulle in die kamer en sou dit nodig raak in die nag, sou ek dan by hulle gaan lê.
As ek aan my een ouma dink, is daar baie gedagtes, maar een wat keer op keer terugkom, is dat ek altyd as ons by haar gaan kuier het, by haar op haar dubbelbed geslaap het. Dit was maar ‘n hol bed, en ek kon nie anders nie as om styf agter haar rug te lê nie. Wat ‘n lekker herinnering! 🙂
Aanvanklik, as Sus en Daan kom kuier het, het Sus in die bababedjie geslaap en ek en Daan het in die spaarkamer geslaap, ek met my een oog oop om te verseker dat hy nie aan die ander kant van die bed afval nie. Deesdae speel ons “musical beds”. Ons staan nie noodwendig in die oggend op dieselfde plek op as waar ons gisteraand gaan slaap het nie. 🙂 Sus het nou ook al oupa en ouma se bed agtergekom! En dis dán wat ek so terugdink aan my ouma, as sy so styf agter my rug lê.
Soggens, as oupa opgestaan het, woel ons drietjies in oupa en ouma se groot bed in. Veral in die winter, het ek probeer om hulle so lank as moontlik nog in die warm bed te hou. Dáár speel ons met ons trekkers en lorries en ons ploeg en plant, ons pak legkaarte en lees boeke. ‘n Paar dae gelede was daar ‘n program op RSG oor die waarde van ‘n ouma, dat sy stadiger is as die ma, dat sy rustiger is (hopelik), dat sy tyd het om met die kleinkinders te spandeer. Die waarde van lees, sê hulle, is nie net die liefde vir lees wat aangekweek word nie, maar die nabyheid. As jy vir hulle lees, sit hulle in jou arm, hulle voel jou liefde, jou warmte, hulle hoor die nuwe woorde, en nou, op my oudag leer ek eers om sommer net te gesels oor die prentjies, nie noodwendig die storie te lees nie. Tyd saam, in liefde gespandeer.
Geniet julle kleinkinders!
Groete
Ouma Toorts
Terloops, vir die mammas: Ek het altyd saans 8 uur, as die nuus begin, met die kinders gaan lê en lees. Dan het ons die lig afgesit en hul het gaan slaap sonder moeite. Die res van die aand kon ek en manlief dan alleen spandeer. Mens hét alleentyd nodig in ENIGE huwelik, veral as daar klein kindertjies ook nog in die huis is.
Toortsie se faceboekblad.
Pragtig! Ook goeie raad. Tyd saam is liefde gespandeer. Hierdie Ouma hoop net sy kan begin aftree sodat sy ook onder die groep “rustig” kan begin verval.
Nou verstaan ek waar jou liefde vir boerdery ook ontstaan het. Dit sommer saam met ouma en oupa in die bed al begin … Lekker!
LikeLike
Die liefde vir boerdery kom sommer van my pa af. 🙂 Ek wil ook aftree vir dueselfde rede. Hul kom in die aand ná uitvaltyd en in die oggend gasn hul weer terug.
LikeLiked by 1 person
Ek geniet my kleinkind en speel heeldag saam met hom.Daar was net nie tyd om dit met my eie kinders te doen nie.Lekker gelees hier!
LikeLike
Myne woon doer ver. Ouma gesels met haar oor Skype. Ai tog.
LikeLiked by 2 people
My hart huil aaam met jou.
LikeLiked by 1 person
Jou inskrywing le hierdie professionele ouma baie na aan die hart! Dis waar wat RSG van lees se – die kleinding se hele lyfie ontspan as ouma ‘n boek oopslaan.
LikeLiked by 1 person
Wat kan ‘n professionele ouma bysê?
LikeLiked by 1 person
Spreuke 17:6 in die ou vertaling se dit so mooi: “Kindskinders is ‘n kroon vir grysaards.”
LikeLiked by 2 people
Absoluut!
LikeLike
My kinders het altyd by ons in die bed kom kruip, so ek verstaan heeltemal van “musical beds”. My oudste dogter het altyd so agter my oorlede ma se rug ingekruip ~ sy praat nog met verlange daaroor.
LikeLiked by 1 person
Ag hoe lekker om ‘n ouma en oupa op ‘n plaas te hê. Geniet hulle, hulle word te vinnig groot.
LikeLiked by 1 person
Dis so lekker om die kleinkinders naby jou te he!! Wat ‘n voorreg!
LikeLike
Dit IS ‘n voorreg. Ek het dit nie van die begin af gehad nie, so ek waardeer dit regtig baie.
LikeLiked by 1 person