Hierdie gedig van Elisabeth Eybers was my gunsteling op skool. Ek het hom met groot passie voorgedra vir ons matriek mondelingse eksamen. Later jare het my Sondagskoolklas hom “opgevoer.”
Maria
’n Engel het dit self gebring,
die vreugde-boodskap – en jy het
’n lofsang tot Gods eer gesing,
Maria, nooi uit Nasaret!
Maar toe Josef van jou wou skei
en bure-agterdog jou pla,
het jy kon dink eenmaal sou hý
die hele wêreldskande dra?
Toe jy soms met ’n glimlag langs
jou liggaam stryk … die stilte instaar …
wis jy met hoeveel liefde en angs
sou hý sy hellevaart aanvaar?
Die nag daar in die stal – geeneen
om in jou nood by jou te staan –
het jy geweet dat hy alléén
Getsemane sou binnegaan?
Toe vorste uit die Ooste kom
om nederig hulde te betoon,
wis jy hoe die soldate hom
tot koning van die volk sou kroon?
En toe hy in jou arms lê,
sy mondjie teen jou volle bors,
het jy geweet dat hy sou sê,
toe dit te laat was: Ek het dors!
Toe dit verby was en jy met
sy vriend Johannes huis toe gaan –
Maria, vrou van smarte, het
jy tóé die boodskap goed verstaan?
Elisabeth Eybers (1915-2007)
Uit: Belydenis in die skemering, 1936
Dis pragtig!!
LikeLiked by 1 person
Dis pragtig.
LikeLiked by 1 person
‘n Gusnteling … ek moes dit ‘n slag voordra by die kersspel
LikeLike
‘n Mens kan dit so gevoelvol voordra. 😉
LikeLiked by 1 person
Ja dit spreek mens persoonlik aan
LikeLiked by 1 person
Dit bly maar mooi!
LikeLiked by 1 person
Dis pragtig, ek onthou dit ook nog van my oudste suster se skooltyd!(Maklik 55 jaar gelede, toe was die gedig baie gewild)
LikeLiked by 1 person